მიუხედავად იმისა, რომ ზაფხულის დასაწყისის გრილი და წვიმიანია, აჭარაში ტურისტული სეზონი უკვე კარგა ხნის გახსნილია. ზღვაზე დასასვენებლად უცხოელი ტურისტებიც არიან ჩამოსული და ადგილობრივებმაც უკვე მიაშურეს შავი ზღვის სანაპიროს. ჩვეულებისამებრ, საქართველოში, საზღვაო სეზონი ივლისიდან იწყებოდა და პიკს აგვისტოში აღწევდა, წელს კი აშკარად გამონაკლისი მოხდა და სეზონი ერთი თვით ადრე გაიხსნა.

ოფიციალური სტატისტიკაც ცხადყოფს, რომ დამსვენებელთა რაოდენობა აჭარაში ერთი წლის განმავლობაში 84%-ით გაიზარდა. მაგალითად, აჭარის ტურიზმის დეპარტამენტის ინფორმაციით, 2011 წლის იანვარ-მაისში აჭარაში 103 360 ვიზიტორი ჩავიდა, 2010 წლის იანვარ-მაისში აჭარაში სულ 56 123 ვიზიტორი იმყოფებოდა, 2009 წლის იანვარ-მაისში კი - 10 364 ვიზიტორი. ბუნებრივია, რომ ტურისტების რაოდენობის მნიშვნელოვან ზრდას მიმდინარე ზაფხულის განმავლობაში ელოდებიან.

როგორც აჭარაში ჩასული დამსვენებლებისგან შევიტყეთ, უცხოელების სიმრავლე საქართველოს შავი ზღვის სანაპიროზე მართლაც თვალში საცემია. სწორედ ტურისტების მოზღვავებას უკავშირებენ ადგილობრივი დამსვენებლები აჭარაში ფასების მნიშვნელოვან ზრდას სერვისსა და მომსახურებაზე. როგორც ჩვენთვის გახდა ცნობილი, საშუალო დონის საოჯახო სასტუმროში ღამის გათევის ფასი უკვე ახლა 35 ლარიდან იწყება. რა თქმა უნდა, ამაში არ შედის კვებისა და სხვა მომსახურების ხარჯები. ყოველივე ამის გათვალისწინებით, სავარაუდოა, რომ სეზონის პიკზე აჭარის კურორტებზე ფასები ასევე პიკს მიაღწევს, ამიტომ ადგილობრივები უკვე სერიოზულად ფიქრობენ, რომ დასასვენებლად მეზობელ თურქეთს მიაშურონ, სადაც შედარებით დაბალი ფასები და მაღალი სერვისია.

ბექა ჯაყელი, ტურიზმის ეროვნული სააგენტოს თავჯდომარის მოადგილე:

- ტურისტების რაოდენობის ზრდა, პირველ რიგში, განპირობებულია აჭარის რეგიონში ინფრასტრუქტურის განვითარების ტემპით და აქტიური მარკეტინგული კამპანიებით საერთაშორისო ბაზრებზე. სწორედ ამის შედეგია ის, რომ დღეს ბათუმის ცნობადობა საერთაშორისო ტურისტულ ბაზარზე მნიშვნელოვნად არის გაზრდილი.

23 ივნისის მდგომარეობით, აჭარაში იმყოფებოდა 295 000-ზე მეტი ვიზიტორი, აქედან 221 000 შიდა ტურისტი, ხოლო 73 500 უცხოელი ვიზიტორი. გასული წლის მონაცემებთან შედარებით სახეზე გვაქვს ტურისტების 86%-იანი ზრდა აჭარის რეგიონში და წლის ბოლომდე, წინასწარი პროგნოზით, 1 500 000 ტურისტის სტუმრობა იგეგმება ამ რეგიონში.

- ე.წ. შიდა ტურისტების რაოდენობა თუ არის გაზრდილი?

- გასულ წელთან შედარებით, ნათი რაოდენობაც გაზრდილია და მნიშვნელოვანია, რომ აჭარაში თბილისის მაცხოვრებლების გარდა, ასევე გაზრდილია საქართველოს სხვა დიდი ქალაქებიდან ჩასული სტუმრების რაოდენობაც.

- წელს ჩვეულებრივზე უფრო ადრე დაიწყო საზღვაო სეზონი აჭარაში. ამას რას უკავშირებთ?

- პირველ რიგში, ეს განპირობებულია იმით, რომ ტურისტული ინფრასტრუქტურა მზად არის ტურისტების მისაღებად და შესაბამისად კერძო სექტორი (სასტუმროები, საოჯახო სასტუმროები და სასტუმრო სახლები) აქტიურად მუშაობენ და მზად არიან სტუმრების მისაღებად.

- ტურისტების მოზღვავება, როგორც ვიცი, ფასებზეც აისახა...

- მიუხედავად იმისა, რომ ძალიან დიდია მოთხოვნა აჭარის რეგიონში მოგზაურობაზე, ვერ ვიტყვი, რომ ფასების მკვეთრი ზრდა შეინიშნება. ზღვისპირა ქალაქების გარდა, ასევე ვითარდება აჭარის მაღალმთიანეთი. ჩვენი საქმიანობის ერთ-ერთი პრიორიტეტი სწორედ შიდა ტურიზმის განვითარების ხელშეწყობაა, რათა ადგილობრივ ბაზარზე მეტად მრავალფეროვანი ტურისტული პროდუქტი შევთავაზოთ მომხმარებელს. ასე რომ, აჭარაში ჩასულ დამსვენებელს წელს ბევრი სიახლე დახვდება, მათ შორის ველოტური ბათუმში და ნებისმიერ მსურველს შეეძლება იქირაოს ველოსიპედი და ისეირნოს განახლებულ ქალაქში. აჭარის მთიანეთში კი, მოეწყობა სახალხო დღესასწაულები, რაც ასევე ხელს შეუწყობს ამ რეგიონის კულტურული პოტენციალის პოპულარიზაციას.

- უცხოელ ტურისტებს შორის ისევ მეზობელი ქვეყნების წარმომადგენლები ჭარბობენ?

- უცხოელ ტურისტებს შორის ლიდერობს თურქეთი, მას მოჰყვება ირანი და ძალიან მნიშვნელოვანია, რომ ირანელი ვიზიტორების რაოდენობა ყოველ წელს იზრდება. მაგალითად, მიმდინარე წლის ხუთი თვის მონაცემებით შემიძლია გითხრათ, რომ საქართველოში ირანიდან ჩამსული ტურისტების რაოდენობა 115%-ით გაიზარდა. ირანის შემდეგ ტურისტების რაოდენობის მიხედვით მოდის აზერბაიჯანი, სომხეთი და მეხუთე ადგილზეა უკრაინა.

- როგორც ცნობილი გახდა, რუსეთის ტუროპერატორები დიდ ინტერესს გამოხატავენ ბათუმის მიმართ და ტურისტების დიდი ნაკადი რუსეთიდან ბათუმში სომხეთის გავლით შემოდის...

- მართლაც მნიშვნელოვნად გაიზარდა რუსი ტურისტების რაოდენობა. მაგალითად, მიმდინარე წლის პირველი კვარტლის მონაცემებით, ზამთრის სეზონზე გუდაურში გაორმაგდა მოსკოველი ტურისტების რაოდენობა და შეინიშნებოდა ტურისტების მოზღვავება ჩრდილოეთი კავკასიიდანაც. შავი ზღვის კურორტების მიმართაც დიდ ინტერესს გამოხატავენ რუსი ტურისტები და ველოდებით ტურისტული ჯგუფების ჩამოსვლას.

- ხშირად ისმის პრეტენზიები საკურორტო ზონაში სერვისისა და მომსახურების დაბალი ხარისხის გამო. ამ თვალსაზრისით თუ შეიცვალა?

- რაც შეეხება მომსახურების დონეს, ეს საკითხი კვლავ რჩება მნიშვნელოვან პრობლემად, თუმცა გარკვეულწილად, რა თქმა უნდა, გაუმჯობესებაც შეინიშნება. ტურიზმის ეროვნული სააგენტო სისტემატურად ატარებს ტრენინგებს მომსახურების ხარისხის გაუმჯობესების თვალსაზრისით, მაგრამ უნდა გავითვალისწინოთ, რომ ეს არის გრძელვადიანი პროცესი. მომსახურების ხარისხის ერთ-ერთი მნიშვნელოვანი წინაპირობაა კონკურენცია ბაზარზე, ამიტომ რაც უფრო მეტი სასტუმრო და მომსახურების ობიექტი იქნება, მით მეტად გაუმჯობესდება სერვისი. ასე რომ, მართალია მომსახურების ხარისხი საქართველოში კვლავ რჩება პრობლემად, მაგრამ ამ მიმართულებით აქტიურად ვმუშაობთ.