12 ივნისს 14:00 საათზე მერაბ ბერძენიშვილის კულტურის საერთაშორისო ცენტრ „მუზა"–ში გაიმართება ქართველი დიზაინერების აქსესუარებისა და ფეხსაცმელების გამოფენა–გაყიდვა. გამოფენილი იქნება ხელნაკეთი ნივთები: ბროშები, სამაჯურები, სხვადასხვა სახის სამკაულები. დამსწრე საზოგადოებას შესაძლებლობა ექნება დაათვალიეროს სხვადასხვა დიზაინერის მიერ შექმნილი ფეხსაცმელები.

კულტურის ცენტრი „მუზა" ამგვარ გამოფენებს ძალაინ ხშირად მასპინძლობს, ეს რიგით მეოთხე გამოფენა–გაყიდვაა. კულტურის ცენტრის მთავარი მიზანია დახმარება გაუწიოს ახალგაზრდა დამწყებ ხელოვანებს და წარადგინოს ისინი ფართო საზოგადოების წინაშე. დიზაინერებს კი საშუალება ეძლევათ თავიანთი ნამუშევრების რეალიზება მოახდინონ.

გამოფენაში ოცი დიზაინერი მონაწილეობს, აქედან უმრავლესობა დამწყები დიზაინერია.

გამოფენაზე წარმოდგენილი იქნება დიზაინერ „ირინოლას" ხელნაკეთი სამკაულები და აქსესუარები. მის კოლექციას კარგად იცნობენ გალერეა „OR Gallery”-ის ვიზიტორები, სწორედ აქ შედგა პირველად მისი კოლექციის პრეზენტაცია. მას შემდეგ მისმა სამკაულებმა სწორედ ამ გალერეაში დაიდო ბინა. დიზაინერი კი თავის მომხმარებელს მუდმივად განახლებული კოლექციით ანებივრებს.