კომპანია "ნატახტარის" თბილისის ლუდის ფესტივალი გრძელდება. სტუმრებს უკვე შეუძლიათ დააგემოვნონ ლუდი და ლუდზე მისაყოლებელი სხვადასხვა კერძები. 17:30 საათიდან კი განახლდება საკონცერტო პროგრამა, კონკურსები და გასართობი ღონისძებები. 
დღეს ფესტივალზე დამსწრეებისთვის მუსიკალურ ნაწილს შეავსებენ ნიაზ დიასამიძე და ჯგუფი "33ა" (ძველი პროგრამით), ჯგუფი "ნალი" (ბლუზ ბენდი), "ფრანი" და სამი პაბის ბენდი. გაიმართება კონკურსები ლუდის სწრაფ და დიდი მოცულობით სმაში, როგორც კაცებს, ასევე ქალებს შორის. სტუმრებს შესაძლებლობა ექნებათ მიიღონ მონაწილეობა სხვადასხვა სახის სპორტულ შეჯიბრებებში და რაც მთავარია მოიგონ 1000 ლიტრი ლუდი, რომელიც დაწესებულია მკლავჭიდში "ნატახტარის" ფალავნის დამმარცხებლისთვის. დღესვე, გაიჭრება სპეციალური (2 მეტრი სიგრძისა და 35 კილოგრამი წონის) სოსისი, რომელიც "კომპანია" ვაკემ სპეციალურად ლუდის ფესტივალისთვის დაამზადა.
წელს ვარდების რევოლუციის მოედანზე უკვე მეორედ იმართება "თბილისის ლუდის ფესტივალი", რომელიც გასული წლის მსგავსად 2 დღის განმავლობაში გაგრძელდება და გაცილებით უფრო მასშტაბური ღონისძიება იქნება. ამით, ევროპის სხვადასხვა ქვეყნებში გავრცელებული ლუდის ფესტივალების ქართული ანალოგი ტრადიციულ სახეს იღებს.
"ნატახტარის" ლუდის ფესტივალს, პირველ დღეს 25 ათასამდე ადამიანი დაესწრო, მათ შორის იყვნენ დედაქალაქის სტუმრები აზერბაიჯანიდან და სომხეთიდან, რომლებმაც ღონისძიების შესახებ მათ ქვეყნებში სპეციალურად წარმართული სარეკლამო კამპანიების შედეგად შეიტყვეს და ამის შემდეგ ეწვივნენ თბილისს.
ფესტივალის ორგანიზატორია კომპანია "ნატახტარი" და ქალაქ თბილისის მერია. ღონისძიების მენეჯმენტს ახორციელებს კომპანია "ბეთერფლაი". მხარდამჭერები არიან კულტურისა და ძეგლთა დაცვის სამინისტრო და ტურიზმის ეროვნული სააგენტო. ფესტივალის საზოგადოებასთან ურთიერთობას უზრუნველყოფს კომპანია "ჯეპრა".