სამშენებლო კომპანიებს, რომლებიც მთავრობის მიერ გამოცემული ე. წ. "ამნისტიით" არ ისარგებლებენ, გაზრდილი ჯარიმები დაეკისრებათ. აღნიშნულთან დაკავშირებით, ცვლილება შედის "ტექნიკური საფრთხის კონტროლის შესახებ" კანონში.

როგორც მთავრობის საპარლამენტო მდივანმა გია ხუროშვილმა განაცხადა, სადამსჯელო ღონისძიებები გატარდება იმ კომპანიების მიმართ, რომლებიც სამი თვის გასვლის შემდეგ არ დაემორჩილებიან კანონით გაწერილ წესებს და ქალაქის არქიტექტურის სამსახურში კორექტირებულ პროექტს არ წარადგენენ.

"თვითმმართველობის მიერ დადგინდება ზონები და კომპანიებს ამის მიხედვით მოუწევთ საკმაოდ გაზრდილი ჯარიმების გადახდა, კერძოდ, 1 კვ.მ-ზე 10 თეთრიდან 1 ლარამდე ოდენობის ჯარიმა, რომლის ათვლაც ყველა ვადაგადაცილებულ დღეზე მოხდება", - დასძინა ხუროშვილმა.

შეგახსენებთ, რომ მთავრობა სამშენებლო კომპანიებისთვის ამნისტიას აცხადებს, კერძოდ - კომპანიებს პროექტის პირობების დარღვევის გამო დაკისრებული ჯარიმა და საურავები ეპატიებათ, თუ ქალაქის არქიტექტურის სამსახურს კორექტირებულ პროექტს და ვადებს სამი თვის განმავლობაში წარუდგენენ. ამ, ერთი შეხედვით, სასიკეთო ინიციატივასთან დაკავშირებით, დაწვრილებით ექსპერტი ეკონომიკურ საკითხებში გია ხუროშვილი გვესაუბრება:

- ბატონო გია, ხელისუფლების მიერ კომპანიებისთვის გამოცხადებული ე.წ. ამნისტია რეალურად მოაგვარებს სამშენებლო სექტორში არსებულ პრობლემებს?

- ჩემი აზრით ეს ე.წ. ამნისტია სამშენებლო კომპანიებისთვის ამ ეტაპზე ერთადერთი შანსია იმისთვის, რომ ინვესტორებთან უფრო ხელსაყრელი პირობებით დაიწყონ მოლაპარაკებები.

- რას გულისხმობთ?

- როგორც მოგეხსენებათ, ქვეყანაში არსებული ეკონომიკური კრიზისის გამო, თითქმის ყველა სამშენებლო კომპანიამ დაარღვია შენობის ჩაბარების ვადები, რის შედეგადაც საკმაოდ დიდი რაოდენობის დავალიანება დაუგროვდათ, როგორც კლიენტების, ისე სახელმწიფოს წინაშე. ეს ფაქტი კომპანიებს ინვესტიციების მოზიდვაში ხელს შეუშლის. სახელმწიფოს მხრიდან ჯარიმებისა და საურავებისგან გაათავისუფლებულ სამშენებლო კომპანიებს კი   ინვესტორების ნდობის მოპოვება გაცილებით გაუდვილდებათ.

- კი მაგრამ, კომპანიები სამ თვეში როგორ მოახერხებენ ინვესტორების მოზიდვას და არქიტექტურის სამსახურში კორექტირებული პროექტების წარდგენას?

- დიახ, ეს მართლაც სერიოზული პრობლემაა. ე.ი. კომპანია, რომელიც მთავრობის მიერ გამოცემული ე. წ. ამნისტიით სარგებლობას გადაწყვეტს, გარკვეული პერიოდის შემდეგ უნდა დაასახელოს ზუსტი ვადა, თუ როდის დაამთავრებს სამშენებლო სამუშოებს. მიუხედავად იმისა, რომ სახელმწიფომ გარკვეული მხარდამჭერი პროგრამები განახორციელა,  სამშენებლო სექტორში კრიზისი ისევ გრძელდება და შესაბამისად, ამ სფეროში ინვესტიციების მოზიდვა საკმაოდ რთულია.

ამიტომ სამთვიანი ვადა ძალიან ცოტაა. დროის ამ მცირე მონაკვეთში ინვესტორის მოზიდვაც და კორექტირებული პროექტების წარდგენაც უბრალოდ წარმოუდგენელია. გამოდის, რომ ხელისუფლების ესოდენ საჭირო და მნიშვნელობან ინიციატივას, ამ სამთვიანი ვადის სრულიად დაუსაბუტებელი სიმცირე აზრს უკარგავს.

იმედია მთავრობა ამას გაითვალისწინებს, წინააღმდეგ შემთხვევაში, შესაძლოა, სამშენებლო კომპანიების უმრავლესობამ უარი თქვას, ამნისტიით სარგებლობაზე.

- უარს როგორ იტყვიან, როდესაც ამნისტიით სარგებლობა სავალდებულო ხდება და ხელისუფლება ურჩი კომპანიების წინააღმდეგ სადამსჯელო ღონისძიებებს გატარებით იმუქრება?

- ეს წარმოუდგენელი რამეა... ამნისტიის სარგებლობა ნებაყოფლობითი უნდა  იყოს.

- ამნისტიის იძულებით სარგებლობის შემთხვევაში, სამშენებლო კომპანიები რა მდგომარეობაში აღმოჩნდბეიან?

- წარმოდგენაც კი მიჭირს, სამშეებლო სექტორი ისედაც კრიზისშია და შესაბამისად უკაპიტალოდ დარჩენილი სამშენებლო კომპანიები ფაქტობრივად გაკოტრების ზღვარზე არიან. ასეთი ტიპის ზეწოლა ამ ბიზნესს ალბათ ბოლოს მოუღებს.