შესაძლოა, ივლისიდან თბილისელებმა დასუფთავების გადასახადი გახარჯული ელექტროენერგიის პროპორციულად გადაიხადონ. დედაქალაქის მერმა, გასულ კვირას საკრებულოში წარადგინა პროექტი, რომლის თანახმადაც, 1 ივლისიდან დგინდება დედაქალაქის "დაგვა-დასუფთავებისა და ნარჩენების მართვის მომსახურების" ტარიფი, რომლის დაანგარიშებაც აბონენტის მიერ გახარჯული ელექტროენერგიის მიხედვით მოხდება - 1 კვტ.სთ 0,05 ლარის ოდენობით, დღგ-ს გარეშე.

გადასახადის ახალი წესის შემოღება, საკრებულოს უახლოეს სხდომაზე იგეგმება. ცვლილების განხორციელებას ქალაქის მერია იმით ასაბუთებს, რომ დედაქალაქში მიგრაციის მაღალი მაჩვენებელია და მოსახლეობის ოფიციალური რეგისტრაციის მაჩვენებელი არ შეესაბამება ფაქტიურ მდგომარეობას, რაც ქალაქში არსებული რეალური სურათის დამახინჯებას იწვევს.

"ქრისტიან-დემოკრატების" ერთ-ერთი წევრი და თბილისის საკრებულოს თავჯდომარის მოადგილე ჯაბა სამუშია ჩვენთან საუბარში აღნიშნავს, რომ ამ ინიციატივით, მოსახლეობას, დასუფთავების მოსაკრებელი, სულ მცირე 50%-ით გაუძვირდება:

"24 ივნისს დაგეგმილ საკრებულოს სხდომაზე, თბილისის მერიამ წარმოადგინა პროექტი, რომლის მიხედვითაც დაგვა-დასუფთავებისა და ნარჩენების მართვის ტარიფი იცვლება. იცვლება როგორც დაანგარიშების წესი, ასევე მისი მოცულობა. დაანგარიშების წესში ცვლილების შესახებ ინფორმაცია ღიაა და ამ შემთხვევაში მერია ამ ინფორმაციას ვერ დამალავდა. რაც შეეხება ტარიფის მოცულობას, ეს არის შენიღბულად გაკეთებული, თითქოს არაფერი არ ხდება, მაგრამ მერიამ თბილისის მოსახლეობას ფაქტობრივად გაუძვირა დასუფთავების გადასახადი.

2010 წლიდან მოყოლებული საკრებულოს თითქმის ყოველ სხდომაზე მერია და უმრავლესობა აძვირებს გადასახადებს: პარკირების გადასახადის გაზრდა, საზოგადოებრივ ტრანსპორტზე გადასახადის გაზრდა, თვის დროზე დასუფთავების ტარიფის გაორმაგება, მიწის გადასახადის გაზრდა და სხვა.  მერიის ბოლო ინიციატივა კი ამ გაძვირების ტენდენციის პიკია, რომლის საფუძველს ვერ მივაგენით.

მას შემდეგ, რაც მოხდა დასუფთავების ფიქსირებული გადასახადის მიბმა ელექტროენერგიის გადასახადთან და შესაბამისად, თუ ამ უკანასკნელს არ გადაიხდიდი ელექტროენერგიის მიწოდება შეგიწყდებოდა, მოსახლეობას ეს არ აკმარეს და დასუფთავების გადასახადის დაანგარიშებაც მოხმარებული ელექტროენერგიის პროპორციულად გადაწყვიტეს. ანუ, ყოველ გახარჯულ 100 კვტ.-ზე აბონენტს დასუფთავებისთვის ხუთი ლარის გადახდა მოუწევს.

ჩვენ გადავწყვიტეთ თვალსაჩინოებისთვის მოსახლეობისგან ამოგვეღო შესაბამისი ქვითრები, რათა დაგვეანგარიშებინა თუ რამდენად გაუძვირდებათ საშუალო სტატისტიკურ თბილისელებს ამ ინიციატივის შემდეგ კომუნალური გადასახადები. ამის დაანგარიშება ნებისმიერს შეუძლია, საჭიროა მხოლოდ რომ ყოველი მოხმარებული კილოვატი გადაამრავლონ 0,05 თეთრზე. იმ მონაცემებით, რაც ჩვენ გაგვაჩნია, თბილისელებს სულ მცირე 50%-ით გაეზრდებათ კომუნალური ხარჯები დასუფთავების ახალი დაანგარიშების სისტემის გამო. შესაბამისად, ის ვინც ზამთარში გასათბობად ელექტროღუმელს იყენებს, ან ზაფხულში კონდიცირების სისტემით სარგებლობს, უნდა გაითვალისწინოს, რომ დასუფთავების მომსახურებისთვისაც მეტის გადახდა მოუწევს.

ეს არის სრული აბსურდი, რადგან წარმოუდგენელია, რატომ უნდა ხდებოდეს ნარჩენების გატანის მომსახურების დაანგარიშება გახარჯული ელექტროენერგიის პროპორციულად.

გარდა ამისა, მერიამ სრულიად უგულვებელყო იმ კატეგორიის ადამიანების ბედი, ვინც მხოლოდ ელექტროენერგიას მოიხმარს, რადგან გაზიფიკაცია იქ ჯერ კიდევ არ არსებობს. თბილისში ჯერ კიდევ არსებობს ასეთი ოჯახები და უბნები. გამოდის, რომ ამ ადამიანებმა უნდა გადაიხადონ გასამმაგებული და გაოთხმაგებული დასუფთავების მომსახურების ტარიფით.

ჩვენი შეხედულებით მერიის ეს გადაწყვეტილება არის აბსოლუტურად უსამართლო, ამიტომ ამ გადაწყვეტილების გასაჩივრებას სასამართლოში ვაპირებთ. ამ გადაწყვეტილების მიღებით მერია პირდაპირ ამბობს, რომ მენეჯმენტის წარმოება ამ სფეროში არ შეუძლია. აქვე უნდა აღინიშნოს, რომ თბილისის ბიუჯეტში დასუფთავებისთვის გამოყოფილია 40 მილიონი ლარი, მათ შორის გათვალისწინებულია თანხა შესაბამისი ინფრასტრუქტურისთვის და იმ ადამიანების მომსახურებისთვის, ვინც ეს სფერო უნდა მართოს. რეალურად გამოდის, რომ ამ ადამიანებმა ვერ მოახერხეს თანხის ამოღების ნორმალური წესის შემოტანა და კერძო კომპანიას გადააბარეს ეს ფუნქცია. ესეც არ იკმარეს და ახლა კერძო კომპანიის მიერ აღრიცხული მოხმარებული ელექტროენერგიის პროპორციულად გადაწყვიტეს ამ თანხის დაანგარიშება. ბევრი რომ აღარ გავაგრძელო, ეს ნამდვილი აბსურდის თეატრია და კარგი მაგალითია იმის საჩვენებლად, თუ რას პირდებოდა ქალაქის მერი თბილისის მოსახლეობას და რეალურად რას აკეთებს."