ალექსანდრე შალამბერიძემ გაზეთ "ვერსიაში" გამოქვეყნებულ ინტერვიუსთან დაკავშირებით ატეხილი აჟიოტაჟის გამო, "ხალხის პარტია" დატოვა."მიმაჩნია, რომ მთელი პასუხისმგებლობა ამ ინტერვიუზე უნდა ავიღო პირადად მე. ეს არის ჩემი შეცდომა", - განაცხადა შალამბერიძემ დღეს გამართულ სპეციალურ ბრიფინგზე, სადაც აღნიშნა, რომ ამ აჟიოტაჟს შეიძლება ბზარი გაეჩინა "რვიანის" ერთობაში.
მისი განცხადებით, ის არის "რვიანის", ერთ-ერთი გულმხურვალე მხარდამჭერი, ქვეყანაში საარჩევნო გარემოს გაუმჯობესების და ამ ცივილიზებული გზით სააკაშვილის ხელისუფლებიდან ჩამოცილების და მას არ სურს, რომ მისი ინტერვიუ გახდეს მიზეზი ერთობის კითხვის ნიშნის ქვეშ დასმის.
"გამომდინარე აქედან, მე როგორც "ხალხის პარტიის" პოლიტიკური მდივანი, მთლიანად ვაცნობიერებ რა პასუხისმგებლობას, ვიღებ გადაწყვეტილებას, დავტოვო პარტიის რიგები, რათა ჩრდილი არ მიადგეს "ხალხის პარტიას", რომელიც ყოველთვის იყო, არის და დარწმუნებული ვარ, მომავალშიც იქნება ოპოზიციური ერთიანობის არა მხოლოდ მხარდამჭერი, არამედ ინიციატორიც", - განაცხადა ალექსანდრე შალამბერიძემ.
ამასთან, "ხალხის პარტიის" ლიდერმა კობა დავითაშვილმა, შალამბერიძის გადაწყვეტილებას უმძიმესი უწოდა და აღნიშნა, რომ ეს არ იყო იოლად მისაღები. კობა დავითაშვილის განცხადებით, შალამბერიძის პარტიიდან წასვლა არის სერიოზული მსხვერპლი, მაგრამ ეს მსხვერპლი აუცილებელი იყო, რათა ბზარი არ გაჩენილიყო "ოპოზიციური რვიანის" ერთობაში.
პარტიის ლიდერმა მადლობა გადაუხადა ალექსანდრე შალამბერიძეს მიღებული გადაწყვეტილების გამო და იმედი გამოთქვა, რომ ეს საბოლოოდ წერტილს დაუსვამს ატეხილ აჟიოტაჟს.
სხვა განცხადებები იმის შესახებ, თუ სად გააგრძელებს ალექსანდრე შალამბერიძე თავის საქმიანობას და დარჩება თუ არა ის პოლიტიკაში, არ გაკეთებულა. ალექსანდრე შალამბერიძე "ხალხის პარტიის" რიგებს 2009 წლის დეკემბერში შეუერთდა, მანამდე კი ის "ნაციონალური მოძრაობის" წევრი იყო.
გაზეთ "ვერსიისთვის" მიცემულ ინტერვიუში (13 ივნისის ნომერი) შალამბერიძე ყვება, "როგორ ეწინააღმდეგებოდნენ "ქრისტიან-დემოკრატები" "რვიანის" მხრიდან სამოქალაქო აქტიურობის დაწყებას".
კითხვაზე, რატომ გაწელა დრო "რვიანმა" განცხადების გასაკეთებლად, შალამბერიძე პასუხობს: "ჩვენ არა, "ქრისტიან-დემოკარტებმა". პირდაპირ გეუბნებით - ასეთი მოთხოვნა დააყენეს, არ გვინდა ეს რადიკალური განცხადებები, რადგან ასეთი დაძაბული პერიოდიაო".
კითხვაზე, იმაზე არ უფიქრიათ, რომ "რვიანში" ერთი უჩავა მათაც ჰყავთ, შალამბერიძე პასუხობს:"უჩავას ყოფნა, რა თქმა უნდა, მოცემულობაა და ჩვენ თავს ვერავისზე ვერ დავდებთ".
გუშინ "ქრისტიან-დემოკრატიული" მოძრაობის ერთ-ერთმა ლიდერმა, ლევან ვეფხვაძემ ამ ინტერვიუს პასუხად განაცხადა, რომ თუ "რვიანის" ფორმატში სხვა პარტიები მათ ეჭვის თვალით უყურებენ, ქდმ გაერთიანებაში ყოფნის საკითხს გადახედავს.
